علق  مودي الجارحي، صانع ألعاب فريق السلة بالنادي الأهلي على توقيع العديد من لاعبين الأهلي للأندية الأخرى مقابل العائد المادي.

 

وكتب مودي الجارحي عبر صفحته الرسمية على “فيس بوك”:” مفيش لاعب بيضحي عشان خاطر النادي الاهلي عدد محدود اللي بيضحي بجد و انا عارفهم و بالأسم في كل الالعاب ، الكل بيستفاد من وجوده في النادي الاهلي  ووجود اي لاعب في النادي الاهلي دا شرف كبير اوي ، قبل النادي الاهلي الاعب مفيش اثنين عارفينوا في الشارع بعد النادي الاهلي مصر كلها عارفاك لمجرد ارتباط اسمك بأسم  النادي الاهلي و الامثلة كتير اوي ، انك ترحل او تتفاوض علي الفلوس دا حقك طبعآ كل واحد بيشوف مصلحته”.

 

ووجه مودي الجارحي رسالة لجماهير النادي الأهلي قائلاً:” احنا كجمهور النادي الاهلي علينا عامل كبير اوي في الكلام دا عشان احنا بنكبر اي حد و بنحسس اي حد انوا فوق النادي و بنضغط علي الادارة و معرفش علي اساس ايه بنعمل كده الاعب دا بياخود عقد قدامه بيتمرن و بيلعب و مطلوب منه يكسب اي بطولة بيلعبها او يعمل اللي عليه  و التوفيق دا بتاع ربنا ، لا احنا كجمهور بعد اي ماتش ننزل ٥٠ بوست للاعب  نشكره و نحسسه انوا خيره علي النادي و انوا كان بيلعب لوحده فا طبيعي الاعب و هو بيجدد هيتشرط علي النادي و لما يجي النادي الاهلي يقولوا دا اخرنا في الفلوس و دا الصح طبعآ فالاعب يمشي فالجمهور بيكون عنده صدمة”.

 

 

 

وأوضح صانع ألعاب سلة الأهلي :”احنا النادي الاهلي و النادي الاهلي مش بيوقف علي حد في اي لعبة ، الاسطورة كابتن محمود الخطيب اعتزل و النادي الاهلي كسب ابو تريكة اعتزل و النادي الاهلي كسب نجوم كتير في كل الالعاب اعتزلت و النادي  الاهلي هو النادي الاهلي هيفضل يكسب ان شاء الله  ، علي فكرة انا بقول الكلام دا و انا لاعب و كابتن النادي الاهلي و زي اي لاعب و الكلام دا ينطبق عليا و لكن الحمد لله طول عمري عارف ان النادي الاهلي خيره علي الواحد اكيد اوقات بتزعل و تدايق من حاجات و لكن عمري ما اقدر اساوم النادي الاهلي قلبي ميجبنيش اني اعمل كده و دا اللي بابايا و مامتي ربوني عليه .

 

واختتم كلامه وقال ” انا بتكلم دلوقتي بلسان واحد من جمهور الاهلي و بالمناسبة اي لاعب يقولك انا مضيت علي بياض بيكون الكلام دا اي كلام بيكون عارف كويس اوي عقده ايه و دا حقه طبعآ ولكن ميقولش بضحي  و في لاعب تاني مش بيمضي غير و كل حاجة مكتوبة في العقد و دا حقه هو كمان بس ميقولش بضحي و المشكلة ان التمثيل و الضحك علي الجمهور هو دا اللي ماشي اليوميين دوول و لكن هيجي اليوم اللي هيبان مين بيمثل و مين بيحب النادي بجد و علي فكرة في ناس زي ما قولت في اول كلامي بتضحي عشان النادي و في كل الالعاب موجودين الناس دي تستاهل الشكر و التقدير علي حبها و غيرتها علي النادي الاهلي و اخر حاجة عايز اقولها وجود اي لاعب في النادي الاهلي في اي لعبة دا شرف بيحلم بي ملايين غيرك” .

النادي الاهلي فوق الجميع…