“تامر حسني” ل”أحمد السقا”: “كنت أتمنى تكلمني بيني وبينك لو زعلان من أي حاجة أو فاهم أي حاجة غلط”

» أخبار الفن » “تامر حسني” ل”أحمد السقا”: “كنت أتمنى تكلمني بيني وبينك لو زعلان من أي حاجة أو فاهم أي حاجة غلط”

شبكة يو دبليو إن الإخبارية

: 11 أكتوبر 2020
: أخبار الفن
: لا يوجد تعليقات

“تامر حسني” ل”أحمد السقا”: “كنت أتمنى تكلمني بيني وبينك لو زعلان من أي حاجة أو فاهم أي حاجة غلط”

كتبت : إسراء عماد

أثارت تصريحات الفنان «أحمد السقا»، في لقائه مع «وفاء الكيلاني»، بخصوص أزمته مع الفنان «تامر حسني»، بعد طرح فيلم «الفلوس»، جدلا واسعا، فحرص الفنان «تامر حسني»، على الرد عليه، فكتب عبر خاصية «الإستوري»، على حسابه الرسمي بموقع تبادل الصور والفيديوهات الشهير «إنستجرام»: “حبيبي وأخويا وصديق العمر ونجم الدنيا كلها «أحمد السقا»، كنت أتمنى انك تكلمني بيني وبينك لو كنت زعلان من أي حاجة أو فاهم أي حاجة غلط؛ لأن الحاجات دي لا يمكن تفوتك وأنا كنت أتمنى مكتبش الكلام ده هنا، بس عشان بعد كلامك في التلفزيون الجمهور الكريم بقى ليه حق إنه يفهم الصح”.

وتابع :”عشان أفكرك بس، أنت كلمتني وقولتلي خبر في موقع وعليه صورة افتراضية للفيلم وكاتبين إنك بطل في الفيلم.. وأنا رديت عليك إن دي اجتهادات صحفية والصورة من تصميم المحبين اللي أكيد فرحوا بالخبر إننا مع بعض، حتى أنا مقولتش إن دي الشركة المنتجة؛ لأنها شركة كبيرة لا يمكن تعمل كدا؛ لأن الفيلم متباع للخارج والداخل باسم أخوك «تامر حسني»، وأصلًا أفيش الفيلم الرسمي نزل والناس كلها شافته، وأنت مش فيه ولا فيه اسمك، وكل الأبطال طالعين مرسومين، معرفش زعلك من إيه الحقيقة، كان ممكن تزعل لو الكلام دا نزل على صفحتي أو صفحة الشركة المنتجة”، وأضاف: “وأنا شرحتلك دا من سنة واتكلمنا بعدها مرتين، مرة عيدت عليك في عيد ميلادك والتانية بخصوص برنامجك لو كنت لسه زعلان كنت هتقولي ساعتها، الفيلم بقاله سنة يا «أحمد»، أخيراً بقى مستحيل الشركة تروج أو أنا أفوت أو أسمح باستخدام اسمك كبطل للفيلم وأنت مش فيه؛ لأن دا هيعود علينا كلنا بالضرر؛ لأن الناس هتدخل الفيلم مش هيلاقوا الكلام دا، فيبقى إحنا كده بنضحك على الناس وضرينا الفيلم؛ ولأن أكيد يشرفني إن احنا نمثل مع بعض بطولة مشتركة؛ أنك حبيبي بجد ونجم أنا بحبه من قلبي فعلًا”.

واختتم حديثه عن مشاركته بمسلسل «ولد الغلابة»: “وبعدين يا حاج «أحمد»، لما أنا جيتلك مسلسلك حصل اجتهادات كتير من محبينك الكرام، شوية يقولوا المسلسل بطولتنا، وشوية يقولوا لا ده ضيف شرف بس وأنت عارف إن عمري ما عملتها وطلعت ضيف شرف غير ليك، ده أنت طلبتني آجي أصور الساعة 8 الصبح كنت عندك في نص ساعة عشان فكرة طلعت في دماغك فجأة وجيت؛ لأنك غالي عندي أوي أوي فوق ما تتصور، وكنت بفرح باجتهادات محبيك ومحبيني حتى لو صورتي صغيرة أو كاتبين بطولة أو ضيف شرف، كل دا مش فارق؛ لأني جيت أخدم صديق عمري، وأتمنى أي كلام يصب في مصلحة مسلسل أخويا وينجح ويكسر الدنيا، أنت حبيبي يا «أحمد»، وصديق عمر، عشان كده أنا مش هزعل منك معلش طولت في الكلام؛ لأن برضو زعلك يعزّ عليا”.

وقد وجه الفنان «أحمد السقا»، رسالة يعتذر فيها للفنان «تامر حسني»، وقال له :”رسالة إلى صديق عزيز… صديقي وأخي العزيز «تامر حسني».. أنت عارف اللي بيني وبينك عيش وملح وحاجات كتير”، وأضاف: “قد أكون أخطأت اني اتكلمت في الموضوع على الهوى، ولكن يعلم الله كم كنت مجروحًا وكم كنت حزينًا.. مش هطول عليك أكتر من كده.. ولو أنا زعلت شوية وأنت شوية نبقى خالصين يا عم… «تامر حسني»، احنا اللي بيننا كتير ماتزعلش يا عم وحقك عليا.. وميعادنا الحفلة اللي جاية”.