كتبت : إسراء عماد 

نشر الفنان «أحمد فلوكس»، صورتين له على حسابه الرسمي، عبر موقع التواصل الاجتماعي «فيسبوك»، وتحدث عن أسوأ فترة في حياته، وعلق على الصورتين قائلا:  “الصورتين دول مابيفرقوش عيني ولا عقلي.. الصورة اللي ببدلة دي كانت في أسوء فترة في حياتي، رغم أني كنت ناجح، وشركاتي بتنجح وبتحرك وبشتغل، وكنت بستغرب انا شكلي بيعجز ليه، وليه عامل كده، وليه الأبيض بقى كتير في دقني، وليه مش سعيد، وليه مش مظبوط، وتساؤلات كتير رغم إني كل شوية كنت بسافر أعمل عمرة، لكن شكلي وحياتي ونفسيتي وتصرفاتي بتسوء لأسوء.. فترة غريبة جدا في كل حاجة”.

وأضاف «فلوكس»: “دي الفترة اللي اكتشفت فيها حاجات كتير، وحصل بعديها واقعة الأمن، دي الفترة اللي السحر والأعمال والدمار وشرور البشر والخيانة والغدر والتوهان، ومش شايف حاجة وكل ما هو سيء بيدمروا فيا، وفي صحتي، وفي حياتي، وأنا مش فاهم حاجة.. معمي البصيرة والإحساس، عجوز من الداخل، مربوط في حزن بلا سبب، رغم نجاحي، مش عاوز أمثل، مش عاوز حاجة ولا فاهم حاجة، وكل شوية مستشفى، وكل شوية تعب، والدكاترة مش لاقية سبب طبي صريح”.

وتابع «فلوكس»: “الصورة التانية دي بعد ما ربنا عفاني وأكرمني بالشفاء من السحر والأعمال، وأذى من حولي، والبصيرة والراحة.. عفاني من أسوء أنواع البشر، وأعطاني البصيرة، لأرى مَن حولي جيدا، وأرى قوة وعظمة ربنا في معطياتوا لينا، ورحمة الله الواسعة.. قربوا من ربنا، واعلموا جيدا أن لن يمسكم سوء، وستنور بصيرتكم”.

واختتم «فلوكس»، قائلا:  “نصيحة اختاروا الناس اللي تبقى في حياتكم كويس.. وابعدوا عن كل شخص مؤذي وكاريه، وماتتخدعوش بالمظاهر والكلام وقربوا قوي من ربنا.. يارب أبعد كل أذى عن بيتي وأهلي وابني، وعبادك يارب.. واعطيني القوى لأحمي أهل بيتي، وابني الصغير من الأذى.. وأدمر كل من يحاول أذيتهم”.