كتبت : إسراء عماد

نشر الفنان «عمرو سعد»، عبر حسابه، على موقع تبادل الصور والفيديوهات «إنستجرام»، صورة للكاتب الكبير «وحيد حامد»، أثناء تكريمه أمس، في مهرجان «القاهرة السينمائي الدولي»، في دورته الثانية والأربعين، وعلق «سعد»، قائلا : ” تكريمك يا أستاذ تكريم لينا كلنا، ولصناعة السينما، وللجملة الحلوة اللي اتربينا عليها، واتعلمنا منها، واخدتنا لسحر الدراما والسينما تكريم بيشاور على جزء من التاريخ القوي اللي بيعيش ويسابق الزمن علشان يوصل لأجيال تانية، علشان يثبت إن الصح صح”.

وتابع «سعد»:  “الأفضل بيستمر مهما كانت الظروف، وتعلمنا ان النجاح مش بالزفة الكدابة، والدوشة والاستعراض أو حتى عدد المتابعين، أو شباك تذاكر بس، أو تريند يروح ويجي غيرة، لأن الفن مش صفحة حوادث، ومش شكل من الخارج ومن جوة فاضي، الفن شقا وشغل وجهد وصنعة وتجربة وفكر، وعلم الفن شرف ومسؤلية تغير، وامتاع وبقاء وتأثير مش مولد يغلب فيه اللي صوته أعلى، وفي الآخر المولد بينفض، ولا حتى منافسة هبلة، وصراع عبيط، الفن ثروة كبيرة قوي، ومسؤلية كبيرة قوي”، وأضاف : “ربنا يديلك الصحة وطولة العمر يا أستاذ، انت واللي زيك ومبروووك لينا تكريمك.