كتبت : إسراء عماد

حل الفنان أحمد زاهر، وزوجته هدى زاهر، ضيوف في صاحبة السعادة، مع الإعلامية إسعاد يونس، على شاشة DMC، وكشفا خلال اللقاء عن قصة حبهما، وكذلك تحدثت هدى، لأول مرة عن المرة التي انفصلا فيها، وحتى الآن لم يعرف أحد عنها شيء.

وقال أحمد زاهر عن زوجته: “الحمد لله ربنا كرمني بزوجة صالحة.. بتساعدني في كل حاجة، معندهاش مانع تسيب أي حاجة عشان تكون معايا حتى لو مش هتعمل حاجة فعلية بس بتبقى معايا، باخد رأيها في كل حاجة أعمالي ولبسي وشكلي والأدوار اللي هعملها، وأنا اللي قررت أشاركها كل تفاصيل حياتي، بتتحملني كتير لما بارجع من تصوير مشهد، وبكون متقمص الشخصية، واتعلمت منها حاجات كتير، ولما كنا بنتفرج على أي حاجة في التليفزيون قلتلها احنا بيننا توافق كبير ليه متشاركنيش في شغلي، ولما وافقت بدأت أعلمها مصطلحات في التمثيل”.

وعن قصة حبهما قالت زوجته هدى زاهر: “أول مرة شوفته كنت في السينما مع ماما، أعجبت بيه في الحقيقة وفي الرجل الآخر كان شكله غريب اوي.. فلما شوفته في الحقيقة قلتلهم أهو شكله إنسان طبيعي مش زي ماكان في الرجل الآخر.. كنا بنحضر عرض خاص في سينما في مدينة نصر، وفضلت مركزة معاه وهو رايح جاي، ماما قالتلي حبيبتي أهدي شوية كده هتفضحينا.. قلتلها ممكن بس أسلم عليه طيب.. وسلمت عليه وكنت منبهرة اوي، ولما روحت البيت قلت لماما هو ده فردت عليا وقالتلي حبيبتي هو ده ايه انت لسة صغيرة، واتخطبنا بعد سنة، وفي الفترة دي ارتبطت وفكيت كذا مرة وهو كمان كان مصاحب بنات، ولما كان التليفون يرن الساعة 2 بالليل ماما كانت بقولي قومي أحمد بيتصل”، ثم قالت هدى لإسعاد يونس:”فاكرة لما كلمت ماما تاني يوم جوازي وكانت عندك في المكتب.. خدتي منها التليفون وزعقتيلي وقلتيلي انت بتكلميها ليه.. هي مش لسة سيباكي امبارح.. ماتروحي تشوفي وراكي ايه”.

وعن انفصالهما قالت:  “كان في فترة هو كان مُحبط اوي؛ لأنه كان تعبان، كان عنده مشكلة كبيرة في الغدة الدرقية، وفيروس بيجي لشخص من كل 10 مليون شخص، ساعتها كان عندي 21 سنة وكان معايا ملك وليلى، وفضل يقول لماما هطلقها عشان متتظلمش وتتعب، وفعلا طلقني وفضلت قاعدة 3 أيام في الأوضة مبخرجش، مقلتش لأي حد انه طلقني وفضل يزعق ويقول دي معندهاش دم خلوها تمشي، وبعد 3 أيام فضل يبوس في إيدي ورجلي ويقولي أنا آسف.. أنا كنت غلطان سامحيني، قلتله أنا مؤمنة بقضاء ربنا ومش زعلانة، وعندي أمل في ربنا أكبر من اليأس اللي عندك ليه تحبطني، ورجعنا لبعض، وجت فترة أنا اللي كنت بجيب الأدوية والتحاليل والدكاترة لحد البيت، عشان هو مكانش بيخرج خالص، مرة حد شافه ماشي في الشارع قاله ايه كرشك ده ، ده انت حتى فنان  يا أخي عيب عليك.. ازاي تسيب نفسك كده وهو مكانش قايل خالص انه عيان”.